بلوچیءِ دیمروئیءُ بلوچانی سیاسی، راجیءُ دودءُ ربیدگی لیکوانی برجم دارگ ءِ رد ءَ ستاہ کرزیں جہدے 1950ءِ دہکءِ گُڈّی سالاں دیم ءَ اتک کہ بلوچ زانتکاراں بلوچی اکیڈمیءِ نامءَ ادارہےءِ جوڑکنگءِ چنءُ لانچ کت ءُ گوں عبدالقیوم بلوچءِ تچءُ تاگاں اگست1958ءَ ماں مستونگءَ زانتکار، شاعر، ندکار، لچّہ کار، سیاسیءُ تمنی سروکانی مزنیں مُچّی ئے برجم دارگ بوت کہ آئیءِ مقصدبلوچی اکیڈمیءِ عملی، سیاسیءُ مالی مدتءُ کمک ات۔ آ وہد ءِ سرکار سکّ نہ وش بوتءُ چما دیوان ءِ چیزے روچ ءَ رند اکیڈمیءِ کارمستر عبدالقیوم گرگءُ بندکنگ بوت پمیشا اکیڈمیءِ جوڑکنگءِ کار چیزے مُدّتءَ مَہتل بوت انت بلے بلوچ زانندگ، شاعرءُ ندکاراں1961ءَ اکیڈمی جوڑ کت۔ 1961ءَ بگرتاں روچء مروچی اکیڈمی پہ بلوچی ءِ دیمروئیءَ شرّیں کردے ءِ واہند انت۔ بلوچیءَ ابید اکیڈمیءَ دگہ زباناں ہم بازیں کتاب چھاپءُ شنگ کتگ ۔  شش قرن ءَ گیش مُدّت ءَ اکیڈمی ءَ  زبان، لبزانک، دود ءُ ربیدگ، عہدی شاعری ءُ قصّہانی صداں کتاب  چھاپ ءُ شنگ کتگ انت  ۔

اکیڈمی ءَ بلوچی زبان ءُ لبزانک ءِ ایدگہ تہراں اَبید چاچ  ءُ مچاچانی   کتاب ہم  چھاپ ءُ شنگ کتگ انت کہ لبزانک ءِ یک تہرے۔  ہمے کتابانی گچین کتگیں چاچ ءُ آہانی بوج (معنا)   اے ویب سائیٹ ءَ یکجا کنگ ءُ شنگ بُوئگ ءَ انت۔ اے سائیٹ (چاچ گنج)  ءَ ہمے چاچ ، آہانی بوج  گوں انگریزی  معناہاں دیگ بُوتگ انت۔اے چاچانی انگریزی زبان ءَ بزانت فضل بلوچ ءَ نبشتہ  کُتگ اَنت۔